2025-2026 Ekintza-plana
Hausnarketa- eta proposamen-dimentsioak uztartuta, Fundación eAtlantic Fundazioaren 2025-2026 ekintza-plana ekintza- eta azterketa-ibilbide orri batean gauzatzen da. Itsasertz atlantikoaren errealitateari eta 2024-2029 agintaldirako Europako Batzordearen lehentasunei estuki lotuta, oparotasun-lehiakortasun binomioa jartzen da lehentasun nagusitzat, EBren erakunde-arkitekturaren balizko erreformen ondoan.
Ekintza-plana bi ardatz estrategiko tematikoen inguruan egituratzen da, fundazioaren helburu fundazionalekin lotuta, eta bi ardatz zeharkakoren inguruan. Horrez gain, Fundación eAtlantic Fundazioak ad-hoc proiektuak bideratu ahal izango ditu, eskaera espezifikoei erantzuteko eta bere helburu fundazionalen betearazpenari laguntzeko.
Ekintza-plana: lan-ardatzak
1. Ardatza
Europako itsasertz atlantiko oparoa, Giza Garapen Iraunkorrarekin eta Nazio Batuen helburuekin konprometitua.
1. Zeharkako ardatza
Fundación eAtlantic Fundazioaren ainguratzea eta posizionamendua.
2. Ardatza
Herritarrengandik gertuen dauden maila instituzionalen parte-hartzea sustatzea Europar Batasunaren gobernantzan.
2. Zeharkako ardatza
Atlantikoaren posizionamendu egokia EBn.
Proiektu puntualak: eskaeraren araberakoak
1. Ardatza
Europako fatxada atlantiko oparoa, Giza Garapen Iraunkorrarekin eta Nazio Batuen helburuekin konprometitua.
Itsasertz atlantikoaren etorkizuneko oparotasuna lortzeko, funtsezkoa da bertako lurralde eta eragileen arteko ikuspegi partekatu eta adostutako ekintza-proposamen batetik abiatzea. Hurbilketa koordinatu horri esker lankidetza estrategikoago batera igaro eta eskualdearen erronkei aurre egitea eta indarguneak aprobetxatzea posible izango da.
Itsasertz atlantikoak bere gero eta handiagoa den periferikotasuna irauli behar du, EBtik kanpoko eragile atlantikoekin harremanak sendotu, eta EBn osotasunez txertatzea lortu. Bere berezitasun atlantikoak behar bezala aitortu eta EBko agendan sartzea da, hain zuzen, batasun koherenteago eta erresilienteago baten eraikuntzan aurrera egiteko gakoa.
Enrico Lettaren Much more than a market eta Mario Draghiren The future of European competitiveness txostenek proposamen eta gomendio zabal eta anbiziodunen katalogoa eskaintzen dute EBren integrazio politikoan sakontzeko, Merkatu Bateratuaren berraktibazioaren eta lehiakortasunaren bidez. Bi dokumentuek eragina dute Batzordearen 2024-2029 agendaren diseinuan eta aktiboki jorratzen dituzte hainbat eragile atlantikok agertutako kezkak eta indarguneak.
Testuinguru horretan, Fundación eAtlantic Fundazioak “Merkatu Bateratuaren eta Europako Lehiakortasunaren Etorkizuna: ikuspegi bat Europako itsasertz atlantikotik” lan-taldea abiaraztea aurreikusten du, honako helburuekin:
• Letta eta Draghi txostenetako proposamen eta gomendioen artean itsasertz atlantikoaren oparotasunerako garrantzitsuenak identifikatzea.
• Lurralde-berezitasunak azaleratzea, haien ezaugarriek proposamen horien ezarpena moteldu edo bizkortu dezaketelako, eta egokitzapenerako bideak proposatzea.
• Eskala atlantikoko proiektu eragileak identifikatzea, lehiakortasun-potentziala garatzeko eta Merkatu Bateratuan txertatze osoa bermatzeko.
• Makroeskualde Atlantikoaren sorrerari eta haren lehentasun tematikoei laguntzea.
2. Ardatza
Herritarrengandik gertuen dauden maila instituzionalen parte-hartzea EBko gobernantzan
EBk premiaz berrikusi behar du bere gobernantza-eredua, hiruko erronkari erantzuteko: 450 milioi herritarren aurrean legitimitatea irabaztea; nazioarteko eszenatoki nahasi batean lidergo geopolitikoa hartzea; eta Ekialderako aurreikusitako hedapenari erantzuteko erabaki-prozesuak egokitzea.
Faktore horien konbergentziak iradokitzen du luzaroan atzeratutako eztabaida instituzional bat berriro zabaltzeko une egokia izan daitekeela. Aukera hori baliatu behar litzateke eztabaida sakon baina oraindik itxi gabe bati heltzeko: gobernantza deszentralizatuaren dimentsioa.
EBk herritarrengandik gertuen dauden aktore politiko guztien gaitasunak aktibatu behar ditu integrazio-helburuak lortzeko. Europako batasunean sakontzea beharrezkoa da, herrien, estiloen eta tradizioen aniztasuna bizirik mantenduz.
Hori horrela, Fundación eAtlantic Fundazioaren lan-plana EBren dinamika instituzionalean aldaketak proposatzera bideratuko da, estatupeko entitateei protagonismo handiagoa emateko eta gobernantza mailaniztuna eraginkorrago bihurtzeko.
“Governantza Mailaniztuna” izeneko lan-talde bat izango da lan horien gidari, honako lan-ildo hauek garatuz:
• Lurralde-mailako partaidetzak eta eskualdeek EBko politika publikoen diseinuan eta kudeaketan duten balio erantsia dokumentatzea, bereziki alor teknologiko, industrial eta posizionamenduari dagokienez.
• Erabaki informatuak hartzeko eta eskumen legegileak dituzten eskualdeen parte-hartzea handitzeko proposamen berritzaileak aztertzea eta formulatzea.
• Makroeskualdeen gobernantza eta eragile subestatal zein interesdunen parte-hartzea aztertzea.
1. Zeharkako ardatza
Fundación eAtlantic Fundazioaren ainguratzea eta posizionamendua
Ardatz honen garapenak hiru helbururekin bat egingo du:
• Fundación eAtlantic Fundazioa bere eremuan sendo ainguratzea: partzuergo egonkorrak sortzea Euskadin eta itsasertz atlantikoan, baita indar handiko eskualde europarrekin ere.
• Diplomazia sozioekonomikoko sare bat ehuntzea, Europako zirkuituetan presentzia duten eta Fundazioaren helburuekin konpromisoa duten aktore euskaldunak eta atlantikokoak bateratuko dituena.
• EBren prozesua euskal gizartean hobeto ulertaraztea: EBko integrazio-prozesua eztabaida, parte-hartze eta dibulgazioaren bidez azaltzea.
2. Zeharkako ardatza
Atlantikoaren posizionamendu egokia EBn
Fundación eAtlantic Fundazioak itsasertz atlantikoaren gaitasunen inguruan narratiba positibo eta partekatua eraikitzen lagundu nahi du, arreta berezia jarriz alor sozialean, naturalean eta teknologiko-industrialean, baita Makroeskualde Atlantikoaren sorreran ere.
Horrez gain, “Atlantikoko Enbaxadoreak” identifikatzeko lan egingo da eta aukera aztertuko da Iberiar Komunitatearen mailako lan-esparru bat artikulatzeko, eta eremu transatlantikoekin, bereziki Latinoamerikarekin.