Iñigo Urkullu lehendakari ohi eta eAtlantic Fundazioko presidenteak Gasteizko Letren Fakultatean egiten ari diren Nazioarteko Zuzenbideari eta Nazioarteko Harremanei buruzko Ikastaroen inaugurazio-jardunaldian hitz egin du, “Gobernantza partaidetua ordena globalean beharrezkoa den Europarako” hitzaldiarekin. Bere hitzaldian nabarmendu duenez, “Europak bere historiako erronkarik ilusionagarrienetako bati egin behar dio aurre: bizikidetza politikorako eredu berri bat eraikitzea, egungo sistema politikoak elkarren ondoan jartzeaz gain, askatasunean, berdintasunean, ekitatean, elkartasunean, justizia sozialean, aniztasunean eta garapen iraunkorrean oinarritutako gizarte berri bat hartzeko eta garatzeko gai izango den demokrazia modu berri bat”.

“Geopolitika globalaren paradigma aldatzen ari garela” onartu ondoren, eAtlantic Fundazioko presidenteak nabarmendu du “egungo nazioarteko errealitatean aurre egin behar diegun arazo nagusietako bi honako hauek direla: alde batetik, praktikan arau batzuk falta dira, gatazka iraunkorra eta oreka globalik eza buru duen mundu mailako testuinguru geopolitiko batetik eratorritako erronkei erantzuteko gai diren nazioarteko arau batzuk; eta, bestetik, mundu mailako lidergo partekatu baten gabeziarekin egiten dugu topo”.

Hori dela eta, Urkulluk azpimarratu duenez, “beharrezkoa eta ezinbestekoa da multilateralismoa suspertzen saiatzea. Eta, era berean, berrasieratu eta indartu egin behar da giza eskubideen defentsaren inguruko mundu-mailako adostasun berrituaren espiritua, bultzada eta bizitasuna. ” Eta Europa aipatuta, onartu du “bere historiako erronkarik ilusionagarrienetako bat” duela: “bizikidetza politikorako eredu berri bat eraikitzea”.

eAtlantic Fundazioko presidentearen ustez, “populismoak eta lider autokratak boterera igotzeak sortzen ari garen gizarte-ereduari buruzko hausnarketa egitera gonbidatzen gaitu. Ikusmolde horretan soberan daude alde anitzeko arauak, eta eroso kokatzen dira munduko kaos geopolitikoan “. Hori dela eta, “Europako herritarrentzat partekatutako erronka da Europako gizarte-eredua eta hari uko egin ezin dioten balio komunak babestea”, azpimarratu du.

“Letta eta Draghi txostenek ohartarazten dute Europak erronka existentzial bati egin behar diola aurre, eta erronka horrek zalantzan jartzen ditu bere oinarriak eta balioak”, adierazi du Urkulluk. “Pozik nago txostenek berresteko eta balioa emateko bozgorailu gisa balio dutelako urte askotan zehar askok defendatu eta esfortzuz praktikara eraman ditugun berrikuntzarekiko eta digitalizazioarekiko sustapen- eta konpromiso-politikak”.

Aurrerago, Europa berri bat biregitimatzeko jarraitu behar den erreformari edo birfundazioari buruzko eztabaidari ekitean, Urkulluk honako galdera hau egin dio bere buruari: “Zein izan behar da helmuga Euskadik bere aterpea eta nazio gisa duen garapena aurkituko dituen Europa baterako? Hemen egin du “Europarako Konstituzio bat berriro eraikitzearen aldeko apustua, integrazioaren bilaketa pragmatismoarekin konbinatuko duena, europar herritarren bizitza eta etorkizuna hobetuz funtzionalki birgaituko dena, Europa versus Estatuak harrizko binomiotik urrun dauden errealitate politikoak aitortuko dituena, Europako herri biziak, aktiboak, solidarioak eta Estatuaren subiranotasun esklusibo eta baztertzailearen aldeko hemeretzigarren mendeko borrokatik urrun daudenak daudela onartuko duena”.